Previa: JERUBEX Santiago Futsal vs Noia P.A.
Co seu terceiro partido en 7
días, os galegos reciben ao líder a clasificación en Santa Isabel nun encontro
que se celebrará a porta pechada este sábado día 6 ás 19:00.
Despois de dous longos desprazamentos en autobús a Móstoles e Talavera, o penúltimo partido desta primeira fase da Segunda División da LNFS enfrontará ao JERUBEX Santiago Futsal e ao Noia Portus Apostoli, no seu terceiro enfrontamento desde outubro e que se retransmitirá a través da canle de Youtube do club.
Os santiagueses buscarán sumar puntos coa vista posta no que será o último partido como local desta primeira quenda de enfrontamentos do subgrupo 2, ante un Noia P.A. que unicamente perdeu un choque no que vai de campionato.
Sobre o encontro David Rial , que contará con todos os seus homes dispoñibles excepto Javi López por lesión e Dani Blanco por expulsión no último partido contra Talavera FS, comentou que “estamos nunha situación complicada, pero a pesar de todo o equipo está a dar a cara. Creo que os nosos tres últimos partidos son o reflexo dun equipo que non se rende e que independentemente das circustancias déixao todo por moi difíciles que se poñan as cousas. Estou convencido de que nese camiño seguiremos e pronto transformaremos en puntos esta actitude.”
“Con respecto ao partido
enfrontámonos ao mellor equipo da categoría, así o din os números e o xogo,
creo que despois do visto é o claro favorito a todo, pero a nós non nos ten que
importar quen estea diante, hai que sumar xoguemos contra quen xogue” comentou
o adestrador santiagués.