O JERUBEX Santiago futsal disputa o seu segundo partido consecutivo contra Ceuta.
Unha semana despois de disputar o seu partido de ida en Santa Isabel, e tras perder cun axustado 2-3, os xogadores do JERUBEX Santiago Futsal loitarán para conseguir o desquite neste partido que corresponde á décima xornada da Segunda División da LNFS e que se retransmitirá na conta de YouTube do club.
Os santiagueses, coa necesidade de sumar puntos, chegan a terras ceutís con Porto e Álex Ares reincorporados no grupo pero teñen, ademais da xa coñecida baixa de Javi López, as dúbidas de Dani Blanco, que sufriu unha contractura muscular no último partido que non lle permitiu finalizar o encontro, e o meta Brais, que viaxará coa expedición aínda á espera de ver como evolucionan as molestias musculares que lle manteñen afastado da portería polo momento.
David Rial, técnico dos de Santiago, analizou o choque para os medios do club comentando que ” vai ser un partido moi parecido ao de hai unha semana, que se decidirá en gran parte por pequenas accións puntuais. Temos que saír ao partido cos cinco sentidos desde o primeiro momento, e tratar de manter o noso xogo cunha intensidade alta durante os 40 minutos ”.
O equipo viaxará o venres en
avión desde Santiago a Sevilla, onde se desprazará a Alxeciras en autobús, embarcándose alí a Ceuta e chegando
na mesma noite dese día. Cunha sesión de vídeo programada para o sábado pola
mañá, disputará o partido ás 17:30 no Guillermo Molina, tendo a volta
programada para o domingo a primeira hora.